Ek Prem Katha Ke Naam
Jeevan mein honi chahiye ek prem katha,
Hona chahiye koi kissa yaad karne ko,
Nahi to kya rakkha hai, gehri sansen lene mein
Saans ruki aur khel khatam
Jeevan mein hona chahiye ek sapna,
Ya sapnon ka ghar,
Nahi to kya rakkha hai eent pathar ki chardiwari mein,
Mahine ki bandhi kishton mein
Jeevan mein hona chahiye koi junoon
Hona chahiye ek jazba chand ghar lane ka
Nahi to kya rakha hai chandrayaan ke safar mein
Batorne gaya hai chand ki mitti
Jeevan mein jaroor honi chahiye ek prem katha,
Hona chahiye koi kissa,
Nahi to din aur raat ki daud mein
khatam ho jayegi kahani,
Dil ban jayega khoon pump karne ki machine,
Aur Jeevan bina jiye hi jiya jayega
4 comments:
full-fill with true emotions...nice
oh!
wot shud i say.....
....full of emotions....great effort dost....
aapki kavitha bahut acchi aur saccchi hain! yunhi likhte rahein yah dua hai :)
Post a Comment